Lansamentu Pagamentu Eletroniku ba Customs Clearance liuhosi plataforma P24

Tersa-feira, 25 Junu 2024

     Autoridade Aduaneira ofisialmente lansa sistema pagamentu eletróniku liuhosi plataforma P24 iha loron 24 fulan-junu tinan 2024. Lansamentu ne'e partisipa husi S.E. Ministra Finansas Sra. Santina Cardoso, Governadora Banku Sentral Sr. Helder Lopes, Vise-Governadora Sra. Sara Lobo, Vise-Ministra Asuntus ASEAN Sra. Milena Rangel, Kordenadora Rezidente ONU nian, membru sira husi Korpu Diplomatiku, Vise-Prezidente CCI-TL Sra. Claricia Lay, parseiru dezenvolvimentu sira, despachante aduaneira sira, komersiante sira no ajénsia governu sira seluk. Sistema pagamentu eletróniku ne'e hanesan inisiativa ida husi Autoridade Aduaneira liuhosi Projetu Janela Únika Nasional. Komersiante sira sei la presiza tan karimbu no asinatura tanba pagamentu sira sei haruka liuhosi P24 ATM ba sistema ASYCUDA. Benefísiu husi pagamentu eletróniku inklui poupa osan, hamenus movimentu ne'ebé la nesesáriu, poupa tempu, no la uza surat-tahan. 

     Plataforma P24 ne'e organiza husi Banku Sentral atu hasa'e transparénsia, seguransa no fasilita komérsiu transfronteirisu ne'ebé diak. Sistema pagamentu eletróniku ida-ne'e bele interopera ho padraun internasionál sira, hamenus tempu desembaraço alfandegário (customs clearance), no aliña ho rekizitu OMK no ASEAN nian. Governu konstitusionál ba dala 9 promove ekonomia dijitál, ho projetu barak liu mak la'o hela hanesan pagamentu eletróniku iha supermerkadu sira, sistema tapping ATM nian, no pagamentu liuhosi telemovel. Projetu pagamentu impostu (taxa) eletróniku mós agora dadaun iha prosesu hela, tanba sei iha etapa sinkronizasaun ba sistema pagamentu banku no impostu. Governu konstitusionál ba dala 9 agradese ba parseiru dezenvolvimentu sira hotu-hotu ne'ebé fó asisténsia téknika oioin ba Autoridade Aduaneira, no mós agradese espesialmente ba UNCTAD nia apoiu ba estabelesimentu sistema pagamentu eletróniku ba desembaraço alfandegário (customs clearance.

Etapa sira atu halo pagamentu eletróniku mak hanesan tuirmai ne'e: 

  • Hetan avaliasaun husi ASYCUDA World
  • Vizita P24 ATM
  • Hatama kartaun ATM no hatama PIN
  • Hili "Pagamentu Servisu" (Pagamentu Alfandega)
  • Hatama Númeru Referensia Avaliasaun
  • Hatama montante ne'ebé sei selu tuir avaliasaun
  • Konfirma pagamentu no foti resibu
Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.