KOMUNIKADU IMPRENSA
PREZIDENTE RAMOS-HORTA HALA’O SORUMUTU HO
VISE-MINISTRU PARLAMENTÁR JAPAUN NIAN BA NEGÓSIUS ESTRANJEIRUS
Dili, 13 Agostu 2024 | Relasaun Internasional, Komunikadu Imprensa
Prezidente no Laureadu Nobel ba Pás, J. Ramos-Horta, simu Vise-Ministru Parlamentár Japaun nian ba Negósius Estranjeirus, S.E. Sr. KOMURA Masahiro, mai Palásiu Prezidensiál Nicolau Lobato. Vizita ida ne’e marka pasu signifikadu ida hodi hametin parseria komprensivu entre Timor-Leste no Japaun.
Prezidente Ramos-Horta no Vise-Ministru Masahiro hala’o enkontru bilaterál hodi diskute koperasaun entre Timor-Leste no Japaun kona-ba dezenvolvimentu infraestrutura, diversifikasaun ekonómika, no kapasitasaun rekursu umanus. Diskusaun mós kobre kontinuasaun apoiu Japaun nian ba prosesu adezaun Timor-Leste ba ASEAN no asinatura akordu ida tuir mai atu hadi’ak Ospitál Nasionál Guido Valadares. Lider na’in rua nota investimentu setór privadu Japaun nian ne’ebé aumenta iha Timor-Leste, inklui projetu sira hosi Tsuneishi Shipbuilding no INPEX Corporation.
Prezidente Ramos-Horta hatete, “Ho ksolok boot ha’u simu Sr. Komura Masahiro iha Timor-Leste. Ita-nia nasaun sira iha relasaun amizade ne’ebé kle’an no metin, ida-ne’ebé sai nu’udar instrumentál iha ita-nia viajen ba dame no konstrusaun nasaun. Apoiu metin Japaun nian sai hanesan fatór xave ba ami-nia progresu. Ami hakarak hametin liu tan ita-nia relasaun no esplora dalan foun ba koperasaun ne’ebé sei fó benefísiu ba ita-nia nasaun rua no kontribui ba prosperidade rejionál.”
Vizita ida-ne’e bazeia hosi momentu viajen produtivu Primeiru-Ministru Xanana Gusmão nian ba Japaun iha Dezembru 2023 no refleta amizade kle’an entre nasaun rua ne’e. Timor-Leste hein atu habelar liután ninia parseria komprehensivu ho Japaun iha tinan hirak oin mai.
Favor hakerek Ita-Boot nia hanoin no ajuda ami hadi’ak ami-nia konteúdu.