MCI Partisipa Iha Abertura Semináriu Kona-ba Timor-Leste Iha Pós-Adezaun ba
Organizasaun Mundiál Komérsiu
Dili, 10 Fevereiru 2025
Sua Exelénsia, Ministru Komérsiu no Indústria (MCI), Sr. Nino Pereira, partisipa ohin iha semináriu ne’ebé organiza husi Vise Primeiru Ministru, Ministru Koordenadór Asuntu Ekonómiku no Ministru Turizmu no Ambiente, Sr. Francisco Kalbuady Lay. Eventu ne’e hetan mós partisipasaun husi Adjuntu Diretór-Jerál Organizasaun Mundiál Komérsiu (OMK), Embaixadór Xiangchen Zhang, no hala’o iha Sentru Konvensaun Dili (CCD).
Semináriu ho tema "Maximiza Benefísiu sira hanesan membru ba OMC: Kria Sinerjia sira ba Integrasaun Rejionál Bo'ot Hanesan Estratéjia ba Dezenvolvimentu Timor-Leste nian to'o 2030", destaka importánsia hosi multilateralizmu no integrasaun ekonómika rejionál iha kreximentu sustentável nasaun nian.
Timor-Leste, nasaun joven liu iha Ázia, hetan ninia independénsia iha 20 Maiu 2002 depois restaurasaun no fó ona prioridade ba adezaun ba OMK no ASEAN hanesan marku estratéjiku sira hodi dudu dezenvolvimentu ekonómiku. Governu iha intensaun atu aproveita rede komérsiu globál sira hodi avansa ninia objetivu sira kreximentu nasionál nian.
Koordenasaun entre prosesu adezaun ba OMK no ASEAN importante tebes hodi maximiza benefísiu sira hosi komérsiu internasionál, apoia reforma doméstika sira no asegura aliñamentu ho Planu Estratéjiku Dezenvolvimentu Timor-Leste nian (2011-2030).
Serimónia abertura marka pasu inisiál ida iha transformasaun ekonómika nasaun nian, hodi subliña katak komérsiu hanesan motor esensiál ida ba dezenvolvimentu sustentável. Esforsu ida-ne'e sei kontribui ba nasaun nia vizaun ba tempu naruk kona-ba kreximentu no prosperidade inkluzivu iha tinan 2030.
Semináriu ne'e hala'o durante loron tolu, hahú hosi loron 9 to'o loron 12 fulan-Fevereiru tinan 2025.
Media_MCI
Favor hakerek Ita-Boot nia hanoin no ajuda ami hadi’ak ami-nia konteúdu.