Embaixadora Maria Anne Hakarak Hametin Liutan Relasaun Timor-Leste ho Filipina
Dili, 17 Fevereiru 2025
Segunda semana ne’e Ministru Nino Pereira simu vizita kortezia Embaixadora Filipina Maria Anne A. Padua iha edifisiu Ministériu Komérsiu no Indústria, diskute kooperasaun bilaterál iha setór ekonomia no atu hametin liutan relasaun Timor-Leste ho Filipina.
"Vizita kortezia ida-ne'e iha intensaun atu hametin liu tan relasaun di'ak entre Timor-Leste ho Filipina, ne’ebé ita hatene, katak durante ne’e Timor-Leste ho Filipina iha relasaun ne’ebé metin tantu iha area polítika no mós iha ekonomia, inklui iha setór seluk hanesan edukasaun." Dehan Ministru Nino Pereira hafoin enkontru ho Embaixadora iha ninia gabinete, Bebora, Dili.
Entretantu Primeiru-Ministru no Ministru Negosiu Estranjeiru vizita tiha ona Filipina no asina tiha ona Nota Entendimentu ida kona-ba kooperasaun politika no mós ekonómika. Nune’e, Embaixadora Maria Anne A. Padua nia vizita ida-ne'e atu realiza akordu entre nasaun rua iha area ekonomia.
"Ita diskute inisiativa sira oinsá ita bele dezenvolve di'ak liu tan, ita-nia Mikro Pekena no Media Empreza sira. Nune’e mós atu haree aspeitu tékniku iha area komérsiu nian. Ami hanoin katak ida-ne’e importante, para ita bele realiza ka halo asaun ba memorandu ne’ebé maka asina tiha ona. Maibé haree mós oportunidade iha area sira seluk atu ita bele explora, ita-nia parte [Timor-Leste], liu-liu Komérsiu no Indústria, atu hetan mós apoia husi governu Filipina nian." Afirma Ministru Nino Pereira.
Ministru Nino Pereira mós agradese Estadu Filipina nia konsisténsia no apoia Timor-Leste iha prosesu adezaun ba ASEAN.
"Teknikamente ita mós haree oinsá maka prepara ita-nia rekursu umanu. Bainhira ita ba iha ASEAN ita mós preparadu. Ami mós husu ona ba iha Sra. Embaixadora, karik iha oportunidade, Ministériu Komérsiu no Indústria bele hetan asisténsia téknika, atu apoia mós ita-nia servisu sira ligadu ba iha ASEAN." Ministru konklui.
MEDIA_MCI
Favor hakerek Ita-Boot nia hanoin no ajuda ami hadi’ak ami-nia konteúdu.