CCT (Cooperativa Café Timor) Lansa Esportasaun Cravinho ba Nasaun Tolu

Dili, 19 Fevereiru 2025

Sua Exelénsia, Vise Ministru Komérsiu no Indústria (VMCI), Sr. Augusto Júnior Trindade, akompaña Sua Exelénsia, Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun, Eng. Mariano Assanami Sabino, iha serimónia lansamentu ba esportasaun ai-kloke, ne’ebé hala’o hosi Cooperativa do Café Timor (CCT) iha Akadirihun, Dili, Tersa-feira ne’e, 18 Fevereiru 2025.

Iha serimónia ne’e, Sua Exelénsia, Vise Primeiru-Ministru, Eng. Mariano Assanami Sabino, hato’o agradesimentu ba CCT no governu Nova Zelandia ba apoiu nafatin ba agrikultór sira, enkoraja produsaun produtu orgániku ba esportasaun.

“Governu iha kompromisu atu fó apoiu nafatin ba setór agríkola, enkoraja produsaun produtu sira ho valór ekonómiku aas no fasilita asesu ba merkadu internasionál sira. Ha’u agradese ba CCT no Governu Nova Zelándia ne’ebé eleva ona ami-nia produtu no apoia agrikultór kafé sira ne’ebé kontinua halo produsaun,” dehan Vise-Primeiru-Ministru.

Iha eventu hanesan, Sua Exelénsia, Vise Ministru Komérsiu no Indústria, Sr. Augusto Júnior Trindade mós agradese ba parseiru estratéjiku sira, hanesan CCT, ba sira-nia kompromisu hodi fó apoiu ba agrikultór sira. Nia destaka katak, maske preokupasaun dalabarak maka merkadu, realidade hatudu katak dezafiu bo’ot liu maka hasa’e produsaun.

“Ohin loron orgullu boot ida ba ita-nia agrikultór sira, tanba produtu sira ne'ebé sira kuda hetan esportasaun. Tinan kotuk ita esporta kafé no kakau, no agora ita esporta hela ai-kloke. Ida ne’e hanesan rezultadu ida ne’ebé impresionante, tanba ai-horis ida de’it bele produs to’o 20 kg, ho folin merkadu ne’ebé varia husi US$5 to’o US$7 kada kg. Ida-ne'e hatudu katak, ho kuidadu ne'ebé loos, agrikultór sira bele hetan sustentabilidade ekonómika ne'ebé boot liu,” dehan VMCI.

Ministru hatutan tan katak MCI kontinua buka merkadu no promove produtu nasionál sira liuhosi plataforma dijitál sira, hanesan website TIP no Made in Timor, ne’ebé fó informasaun hodi fasilita importasaun no esportasaun produtu timoroan sira.

Prezidente Kooperativa Kafé Timor, Sr. Mário Soares destaka katak CCT iha membru barak iha munisípiu sira no katak, ho apoiu hosi governu sira Nova Zelándia nian no Estadus Unidus nian, sira konsege kuda no mantein produtu sira ho valór ekonómiku aas iha merkadu internasionál.

“Produtu sira hanesan kafé, kakau, baunilla no ai-kloke iha valór ekonómiku ne’ebé boot. Membru kooperativa sira fa’an produtu sira ne’e ba CCT, kontribui ba hadi’a ekonomia familiár”, dehan Prezidente CCT.

Agora daudaun, CCT, iha parseria ho setór dezenvolvimentu sira, prepara ona kontentór tolu ho ai-kloke ba esportasaun, ne'ebé sei haruka ba Estadus Unidus, Fransa no Índia.

Serimónia ne’e hetan partisipasaun husi Vise-Primeiru-Ministru, Vise-Ministru Komérsiu no Indústria, ekipa kuarentena, reprezentante estrutura CCT, parseiru dezenvolvimentu, agrikultór no konvidadus sira seluk.