Enkontru Bilaterál : Timor-Leste no Sekretáriu-Jeral ASEAN Diskute Adezaun ba ASEAN

Desaru, Johor, Malázia, 27 Fevereiru 2025

Ministru Komérsiu no Indústria Timor-Leste, S.E. Nino Pereira, hala’o enkontru bilaterál ho Sekretáriu Jerál ASEAN, Dr. Kao Kim Hourn iha marjen Retiru Ministru Ekonómiku ASEAN (Retiru AEM) ba dala 31 iha Desaru, Johor, Malázia.

Enkontru ne’e ho objetivu atu ko’alia kona-ba Timor-Leste nia progresu iha ninia adezaun ba ASEAN, ho énfaze espesiál kona-ba ninia integrasaun iha Komunidade Ekonómika ASEAN (AEC).

Iha enkontru ne’e, Ministru Nino Pereira fornese atualizasaun ida kona-ba Timor-Leste nia esforsu atu aliña ho Instrumentu Jurídiku Komunidade Ekonómika ASEAN nian, hodi reafirma nasaun nia kompromisu atu kumpre ezijénsia ekonómika ASEAN nian. Nia hato’o agradesimentu ba asisténsia téknika kontinua no apoiu kapasitasaun husi Sekretariadu ASEAN (ASEC) no Estadu-membru ASEAN (AMS), subliña importánsia husi kooperasaun kontinua atu fasilita integrasaun ne’ebé la’o ho di’ak iha bloku rejionál.

Dr. Kao rekoñese Timor-Leste nia progresu signifikativu hodi sai membru kompletu ASEAN nian no enkoraja nia ofisiál tékniku sira atu partisipa ativu iha enkontru sira ASEAN nian. Nia subliña importánsia husi Timor-Leste kontribui ninia perspetiva sira kona-ba ajenda prinsipál sira ne’ebé diskute iha ASEAN.

Sekretáriu-Jerál ne’e mós mensiona katak objetivu prinsipál ida husi Retiru AEM ba dala 31 mak atu ko’alia kona-ba Timor-Leste nia adezaun no integrasaun ekonómika. Rekomenda katak Governu Timor-Leste envolve setór privadu iha prosesu adezaun, subliña ninia papél krusiál hodi hametin lasu ekonómiku sira iha ASEAN nia laran. Liután, nia reafirma kompromisu Sekretariadu ASEAN nian atu apoia esforsu integrasaun Timor-Leste nian liuhosi inisiativa hasa’e kapasidade.

Timor-Leste iha nafatin kompromisu atu alkansa adezaun tomak ba ASEAN, ho integrasaun ekonómika nu’udar prioridade prinsipál iha ninia prosesu adezaun, ho apoiu husi Sekretariadu ASEAN.

 

 

Media_MCI

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.