Sorumutu Bilaterál: Timor-Leste no Malázia Haforsa esforsu ba

Integrasaun Ekonómika no Adezaun ba ASEAN

Malázia, 27 Fevereiru 2025

Ministru Komérsiu no Indústria, Nino Pereira, hasoru malu ho Ministru Investimentu, Komérsiu no Indústria Malázia, Tengku Zafrul Aziz, iha ambitu Retiru Ministru Ekonomia ASEAN ba da-31 (Retiru AEM), hodi diskute kona-ba adezaun Timor-Leste nian ba ASEAN no área potensiál sira ba kooperasaun ekonómika.

Ministru Nino Pereira kongratula Malázia na ninia Prezidénsia ASEAN tinan 2025 no fó informasaun kona-ba progresu Timor-Leste nian iha kumprimentu ba rekizitu legál sira Komunidade Ekonomika ASEAN (KAE). Timor-Leste nia kompromisu ba integrasaun ekonómika rejionál no buka orientasaun hosi Malázia kona-ba akordu ekonómiku ASEAN nian. Ministru Nino Pereira mós husu apoiu kontinua hosi Malázia atu fornese asisténsia téknika no programa kapasitasaun hodi tulun Timor-Leste alina ho enkuadramentu ekonómiku ASEAN nian.

Ministru Tengku Zafrul rekoñese progresu signifikativu ne'ebé Timor-Leste halo ona iha adezaun ba ASEAN no enkoraja nasaun ne'e atu aselera submisaun instrumentu prontu sira hodi fasilita prosesu integrasaun ne'ebé di'ak iha Prezidénsia Malázia nian tinan ne’e. Nia mós fó konvite ba Timor-Leste atu partisipa iha konferénsia emprezariál sira iha Malázia, ho objetivu atu hasa'e oportunidade komérsiu no investimentu entre nasaun rua ne'e.

Sorumutuk ne'e remata ho troka memória, hodi simboliza parseria no komitmentu kontinua entre Timor-Leste no Malázia iha avansa kooperasaun ekonómika rejionál.

 

Media_MCI

Informasaun ne’e ajuda Ita-Boot?
Favor hakerek Ita-Boot nia hanoin no ajuda ami hadi’ak ami-nia konteúdu.