MKI NO EMBAIXADA MALÁZIA DISKUTE KOOPERASAUN IHA AREA SERTIFIKASAUN
PRODUTU TIMOR-LESTE BA MERKADU INTERNASIONÁL
Dili, 5 Marsu 2025
Ministériu Komérsiu no Indústria aproxima ona Embaixada Malázia iha Timor-Leste, hodi buka apoiu tékniku atu fasilita prosesu sertifikasaun produtus, nune’e produtus husi Timor-Leste bele simu iha merkadu internasionál.
Aproximasaun ida-ne’e hala’o iha kuarta-feira semana ne’e, liuhosi Diretór-Jerál Indústria señor Martins Magno, ne’ebé akompañadu hosi Eis Prezidente AIFAESA señor Ernesto Monteiro, hodi hasoru malu ho Embaixadór Malázia iha apartamentu Palms Spring, Hudi-laran, Dili.
Iha sorumutu ho Embaixadór Dato Amarjit Singh Sarjit Singh, Diretór-Jerál Martins Magno hato’o pedidu ba Embaixada Malázia atu ajuda Ministériu Komérsiu no Indústria iha prosesu estabelesimentu sertifikasaun produtus no estandardizasaun, ne’ebé sai asuntu importante ba Timor-Leste iha prosesu integrasaun ba Komunidade Ekonómiku ASEAN.
“Iha sorumutu ne’e ita deskuti ho señor Embaixadór kona-ba rekezitu sira esensiál no ida-ne’e petinente teb-tebes ho responsabilidade MCI nian, iha prosesu sira adezaun Timor-Leste nian ba ASEAN, no atu asigura katak Timor-Leste nia adezaun ba ASEAN sei la ba mamuk de’it.” Dehan Diretór-Jerál Martins Magno.
Liután, Diretór-Jerál hatete, sorumutu ida-ne’e nu’udar mós koordenasaun ho Embaixada Malázia ba Estadu Malázia ka Instituisaun relevante Malázia nian, bele iha dalan atu apoia Ministériu Komérsiu no Indústria iha prosesu sira atu sertifika no estandardiza produtu Timor-Leste nian, nune’e bele hetan legalidade atu sirkula iha merkadu, tantu nasionál ka internasionál no atrai investimentu mai Timor-Leste.
Embaixadór Dato Amarjit Singh anota asuntu ida-ne’e no garante nia apoiu tomak, tanba asuntu ida-ne’e importante atu garante seguransa alimentár iha Timor-Leste. Entaun, Embaixada Malázia iha Timor-Leste sei halo kontatu ho institusaun relevante sira iha Malázia atu tulun Ministériu Komérsiu no Indústria iha futuru.
Embaixadór mós garante katak Institusaun Públika Malázia nian ida, ne’ebé hanaran SIRIM (Stardard and Industrial Research Institute of Malaysia) ne’ebé relevante ba asuntu refere, sei mai iha Timor-Leste hodi hasoru malu ho Ministériu Komérsiu no Indústria hodi estabelese kooperasaun atu tulun sertifikasaun produtus, maibé presiza iha koordenasaun atu ajusta ajenda iha tempu tuir mai.
“Ami-nia Instituisaun Públika ida-ne’ebé responsavel daudaun ne’e mak SIRIM (Standard and Industrial Research Institute of Malaysia) bele hasoru malu ho MKI iha tempu sira ne’ebé sei mai, tuir planu no ajendamentu ne’ebé sei konkorda hamutuk.” Hatan Dato’ Amarjid.
Mídia_MCI
Favor hakerek Ita-Boot nia hanoin no ajuda ami hadi’ak ami-nia konteúdu.